23 Xuño 2016 – A Fundación Axencia Enerxética Provincial da Coruña (FAEPAC), dependente da Deputación da Coruña, e o Instituto Tecnolóxico de Galicia (ITG) colaborarán en proxectos destinados a mellorar o aforro e a eficiencia enerxética dos concellos e a impulsar o uso de enerxías renovables.
Así se recolle no convenio suscrito esta mañá, na sede da institución provincial, polo presidente da Deputación e da FAEPAC, Valentín González Formoso, e o director do ITG, Carlos Calvo Orosa, no que se estipula que ambas entidades “intercambiarán experiencias” e sumarán os seus esforzos en “proxectos de interese mutuo dentro do marco enerxético”, así como en actividades de formación e na elaboración de auditorías enerxéticas.
Este acordo de colaboración inscríbese na intención do actual Goberno provincial de “revitalizar” a FAEPAC e “poñela a disposición dos concellos como un instrumento útil para reducir a súa factura eléctrica e mellorar a súa eficiencia enerxética”, afirmou o presidente provincial, Valentín González Formoso, que lembrou que para moitos municipios rurais a factura eléctrica supón a maior partida do gasto corrente.
A FAEPAC, fundada en 2006, prestou servizos de análise e control de facturación eléctrica durante o pasado ano a 18 concellos da provincia, permitíndolles importante aforros na súa factura, que nalgúns casos superaron os 50.000 euros anuais.
Plan de Medioambiente
Ademáis, o novo Plan de Medioambiente aprobado pola Deputación o pasado mes de maio e dotado con 5 millóns de euros, permite aos 93 concellos coruñeses financiar auditorías enerxéticas e accións de mellora e renovación das instalacións produtoras de enerxía, dos sistemas de alumeado público e dos sistemas de climatización de instalacións municipais, o que contribuirá a diminución do consumo eléctrico.
- Nota de Prensa emitida pola Deputación da Coruña
